Landsbankinn er traustur samherji í fjármálum

Við ætlum að byggja upp velferð til framtíðar í íslensku samfélagi. Samfélagsstefna Landsbankans miðar að því að rekstur bankans stuðli að sjálfbærni í íslensku samfélagi, hann sé hreyfiafl og starfi í samræmi við ábyrga stjórnarhætti. Efnahagslíf, samfélag og náttúra eru hluti af sama kerfinu og vöxtur fyrstnefndu þáttanna tveggja getur ekki farið út fyrir þau endanlegu takmörk sem náttúran setur. Sjálfbærni vistkerfa og öflugt atvinnulíf eru samþætt og samrýmanleg en ekki andstæður.

Við ætlum að vera hreyfiafl í samfélaginu. Í þeim tilgangi munum við eiga frumkvæði að samstarfi við fyrirtæki, stofnanir og samtök um nauðsynlegar breytingar á atvinnuháttum og innviðum sem stuðla að aukinni sjálfbærni íslensk atvinnulífs og samfélags með það að markmiði að tækifæri Íslands í þessu sambandi verði nýtt með sem bestum hætti fyrir land og þjóð til framtíðar. Saman sköpum við ný viðskiptatækifæri með áherslu á sjálfbærni.

Stefna Landsbankans er að vera til fyrirmyndar og að vera traustur samherji í fjármálum. Við ætlum að vera í fremstu röð hvað varðar samfélagsábyrgð fyrirtækja á Íslandi.

Grunnviðmið sjálfbærni

Við ætlum að fylgja þremur grunnviðmiðum sem lúta að umgengni við náttúruna og einu samfélagslegu viðmiði.

Í framtíðinni munum við þurfa að taka ákvarðanir í álitamálum sem ómögulegt er að sjá fyrir. Grunnviðmiðin um sjálfbærni munu leiðbeina okkur í þeirri ákvörðunartöku.

Sjálfbærni vistkerfa

Þegar rætt er um þjónustu vistkerfa er átt við að mannkynið nýtir sér þjónustu eða afrakstur vistkerfa náttúrunnar, s.s. náttúruauðlindir og ýmis náttúruleg ferli. Náttúran og þjónusta vistkerfa er í grundvallaratriðum mikilvægasti framleiðsluþátturinn í hagkerfinu. Oft er rætt um að umhverfið, samfélagið og hagkerfið séu eins og þrífótur þar sem hver fótur styður við hina tvo. Einnig má hugsa um samspil þessara þátta sem þrjú háð mengi, þar sem umhverfið er stærsta mengið sem samfélagið og hagkerfið eru hluti af. Umhverfið er hinn náttúrulegi höfuðstóll mannskyns sem sér okkur fyrir lífsnauðsynlegri þjónustu vistkerfa. Miðjumengið er samfélagið, eða mannauðurinn. Hagkerfið er minnsta mengið því það stjórnast af reglum og skipulagi hina tveggja mengjanna. Atvinnulífið getur haft veruleg áhrif á getu vistkerfa til að sinna sinni þjónustu, en til að atvinnulífið geti þrifist, þarf það á þjónustu vistkerfa og heilbrigðu samfélagi að halda.

Sjálfbærni vistkerfa og heilbrigt atvinnulíf eru samþætt og samrýmanleg markmið.

• Vera hreyfiafl í samfélaginu með því að eiga frumkvæði að samstarfi við fyrirtæki og stofnanir um nauðsynlegar breytingar á atvinnuháttum og innviðum sem stuðla að aukinni sjálfbærni íslensk atvinnulífs og samfélags.
• Taka ákvarðanir um þjónustuframboð og aðra þætti í rekstri bankans út frá forsendum sjálfbærrar þróunar.
• Hvetja viðskiptavini og samstarfsaðila okkar til að fylgja stefnu um samfélagsábyrgð.
• Hefja lánveitingar til umhverfisvænna verkefna með útgáfu grænna skuldabréfa í samvinnu við erlenda fjármögnunaraðila.
• Gæta að sjálfbærni við mat á fjárfestingamöguleikum, lánveitingum og verðlagningu.